#唔係廣告 #自費系列 #女人嘢
唔再用M巾棉條，唔使焗住過嗰幾日，唔使三四個鐘頭搵廁所換，唔再製造難以分解嘅廢物，廁所個垃圾桶唔再發臭！我唔係更年期😂而係我成功轉用咗#MoonCup （又叫 #月光杯、#月亮杯 或者 #月經杯 ）
｛人生第一個杯｝
我第一個杯係Me Luna Cup，太軟杯口好難打開，杯身連杯柄高度太矮，好難拎返出嚟，搞唔掂放棄咗，繼續去尋覓我嘅「真命杯子」
｛人生第二個杯｝
上網search見到有用家分享韓國製的Tieut Cup ，話質地比較硬身，好易打開，再睇spec，杯口直徑只有38mm，連杯柄高度有70mm，容量竟然有32 mL，唔使成日倒！所有條件都似乎適合我屬於高宮頸、曾剖腹分娩嘅Moon Cup新手。
好想快啲試用，我竟然好期待M come！
｛找到真正零感｝
今個月M come一大清早嚟，凑住兩個女嚟唔切試杯，拿拿聲用返棉條先，中午先第一次試。（本身用開棉條的人轉用杯會比較易接受同適應架）經過上個月嘅練習，今個月第一次放就成功放入，杯口亦即時打開，估唔到咁易。我用嘅摺法係Punch Down Fold，會feel到條邊卜一聲彈開，但唔痛嘅。（Moon Cup係要先摺細才放入去的）
用過棉條嘅話，你會知道有條繩多少都有點感覺，而且去廁所又會整污糟，好煩。而Moon Cup，只要擺啱位置，杯柄唔好突咁出就感覺唔到佢嘅存在，係 #真正零感！
｛倒杯、沖洗、放回｝
五個鐘頭後（Day 1 17:00）見兩個女仲瞓緊去倒一倒個杯先。1/3滿（約在10ml的刻度），完全冇漏，用些少「便便」嘅力推佢就輕鬆地拎返出來，Tieut Cup杯底有防滑凹凸坑紋，很好拿揑，所以我也沒有倒瀉 🙂 先放一張廁紙喺馬桶才倒「杯中物」就不會沉在馬桶渠口（或索性先小個便），沖廁一定沖得乾乾淨淨。
聽從谷友嘅貼士，我拎支熟水入廁所沖洗杯身 ，我支水700ml 左右，都足夠沖乾淨杯子裏裏外外。最衰我掉咗個產婦專用沖洗瓶，否則相信更慳水更乾淨。
沖洗完畢直接放回，今趟失敗了，漏——！！拎返出嚟再重新來過。
｛關於氣孔｝
夜晚沖涼前打算再次清洗時，發現又有少少漏，唔知關唔關Tieut Cup有4個氣孔事，因為我拎出黎嗰陣，啲氣孔都有啲血，再沖洗一次放回又冇再漏。
Tieut Cup 4個氣孔較Me Luna Cup大一點，而且向杯邊開，比一般向杯中央開的長。雖然氣孔長，但非常易洗，可能因為光線折射，只要有少少污糟都睇到。
Day 2 09:30起床時發現有些少漏（分量約一毫子大小），以為滿瀉，點知原來都係1/3滿咋喎，我相信有氣孔就點都會有少少漏。但別忘是因為有氣孔才這樣容易取出的！
｛成功挑戰12小時清杯極限｝
朝早09:30清洗過一次，21:30沖涼順便洗杯。說明書上Up to 12小時清一次杯係真係得架！12個鐘喎！你諗吓用M巾或棉條係幾多個鐘去換一次？凑女真係爽好多，唔使成日唔記得換，要突然掉低兩個女衝去廁所。
｛我的消毒方案｝
預計嚟M日前一晚消毒Moon Cup一次，用滾水煲5分鐘，風乾後放入儲存盒收喺廁所鏡櫃（若姨媽未見影又再消毒） 。
使用期間朝早用熟水沖洗就直接放回，夜晚沖涼前用花灑勁沖，洗完用消毒丸浸15分鐘（第一晚冇浸，諗諗吓都係驚會吽菌）。
M完要洗得乾乾淨淨，尤其四個氣孔要用專用刷刷淨，之後用滾水煲5分鐘，風乾入盒儲存。
｛儲存盒｝
值得一提嘅係，Tieut Cup隨杯配有矽膠可折疊儲存盒，帶出街好慳位，更可跟杯一齊放落滾水消毒。
｛總結｝
世事沒有絕對的好，也沒有絕對的壞，睇你點樣選擇！
