喺我凑妹妹嘅呢三個月，我發現同凑家姐嗰陣好唔同，唔係比較佢地兩個，係我覺得足月同唔足月係有分別。
我再仔細計返，雖然家姐出世size等如37週，醫生一直灌輸我佢係37w0d 但以maturity 黎睇，佢只係35週4天，其實家姐係個早產bb。不過係唔係早產，都過咗去，冬甩一直都算健康。而妹妹係38週6天出世，係個重磅bb。
咁分別喺邊呢？
一、食奶
家姐食兩啖就冇力要瞓，埋身食唔到奶，生長線跌到冇譜，結果要全泵。妹妹出世喺醫院啜曬兩邊食足30分鏡，返到屋企開始一邊食十分鐘就飽。
二、感官
妹妹兩個幾月就識同人互動，會主動同床邊玩具呀呀互動，家姐都遲一兩個月先有呢啲反應。
三、轉身
妹妹兩個幾月就開始側睡同嘗試轉身令我好驚訝，家姐要到四個月先開始想轉身。
四、睡眠
妹妹係比較有安全感，作息比較定時有規律，好快就戒夜奶，家姐一歲先戒到夜奶。不過戒夜奶真係唔知關唔關早唔早產事。
五、腸道發展
妹妹兩個幾月開始冇再餐餐屎，早午晚各一大篤，尿布疹已經好得8899。家姐四個幾月仲痾好密，半夜都會爆片，仲有好嚴重嘅尿布疹，媽媽不停四處搜羅好用嘅藥膏。
所以我好感恩，喺要一打二之際，我有一個好好凑嘅細女！
祝願每個bb都住足37週，最好39週後先出黎！
同埋切記每個bb都有自己專屬嘅成長步伐，係早係遲都唔重要。
Mama love you both!
