話說上年11月中去做子宮頸抹片檢查時，醫生話：「你3x歲，應該照吓乳房 ，因為乳癌都有年紀化趨勢」的確係，身邊有朋友都有，所以好乖咁做左個3D Mammogram + ultrasound，當時醫生喺ultrasound 影像上面拉線度距離，我都心知不妙。
過幾日醫生打嚟，佢話我有個直徑1cm嘅腫塊（聽得出醫生刻意唔用腫瘤二字），佢話個grade係Birads 4a，唔係123咪即係好嚴重？！聽電話嗰陣我同緊兩個女落街踩單車，唔係好專心咁聽，真係希望自己聽錯，但收到報告，真係Birads 4a 簡單講，Birads 係「外貎協會」對腫瘤嘅評分，4a即係醫生望落有少少樣衰，有2-10%嘅可能性係惡性，建議抽組織化驗。
即刻約抽針，醫生解釋完之後，我揀咗抽粗針，因為我打算如果良性就唔割，萬一惡性都唔想留有少少疑慮，所以我想要個百分百準確嘅化驗結果。（幼針其實都有99%準） 抽針過程真係唔係好痛嘅，因為打左局部麻醉。我個瘤生得好深，深到我一路而來見幾個醫生都摸唔到，抽針嘅醫生好大力隊左好幾下先到達個瘤，我終於覺得有啲痛，如果唔深應該完全冇感覺的。醫生開頭話抽三四針，但佢抽左兩針就完成了，醫生睇睇啲組織，同我講佢睇就似良性，我諗醫生唔會亂噏，不過又唔敢信曬囉。
結果囉囉攣咗一個星期（我唔想做電療個胸會燶咗甩皮），返去診所睇報告，入去之前真係心肝仔都跳咗出嚟，姑娘嗌名即刻執返個心然後急急腳入去。醫生：「坐吖」然後等我放低袋坐好再話「好消息！」然後我已經唔想理details了，okok，有聽的，係良性嘅纖維瘤，唔使割，一年照一次就得。跳起yeah啦！
分享呢單嘢係想話畀大家聽 1）一定一定一定要定期做身體檢查 2）Birads 4a 真係好大機會（90-98%）係良性嘅，唔好太擔心!
P.S.爸爸媽媽，要你地擔心了，對不起 ! 也要多謝分享經歷安慰我嘅好朋友，多謝陪我兩份驚嘅好姊妹，多謝聽我呻嘅一眾閏蜜！
圖為九年前去Fiji度蜜月嘅照片
#乳癌
#Birads
#女性健康
#圖文不符
#媽媽日常f
